Tíðindi

Genturnar vórðu bólkaðar í tveir bólkar og telvaðu síðani móti øllum. Í eldra bólkinum var Hanna mettur favorittur frammanundan, meðan yngri bólkurin var púra opin.

Hanna livdi upp til favoritleiklutin og lat ongan iva vera um úrslitið. Hon vann trygt øll talvini og gjørdist tí Føroyameistari fyri gentur í 2012. Nr. 2 gjørdist Zoe og Súsanna bleiv nr. 3.

Yngri bólkurin var sera spennandi og javnur. Tá samanumkom, endaðu Angela og Hjørdis Maria á 1. plássi, meðan Dania og Ronja lógu beint eftir.

 

Karmarnir vóru enn eina ferð av teimum bestu í Kollafjarðar Skúla og primus motor er framvegis Kári Durhuus, sum hesa ferð fekk hjálp frá einastu kvinnuni í TSF Liljan Jacobsen, meðan Elmar R. Fjallheim var dómari.

 

Hjartaliga til lukku við Føroyameistaraheitinum !

Umhugsunartíðin 15 minuttir til hvønn telvara, hvørt umfar. 

Telvað verður í opnum bólki

Luttøkugjald

Tað er ókeypis at luttaka

Tilmelding

Luttakarar kunnu melda seg til við at senda teldupost til faroechess@faroechess.com ella smsa til 21 99 19.

Upplýsið navn og rating

Meldið luttøku í seinasta lagi fríggjadagin 24. februar kl. 19.00.

Vinningar

Steyp verða latin nr. 1,2 og 3.

Harafturat er FM-kappingin vegleiðandi úttøkukapping til NM fyri gentur.

Við talvkvøðu

TALVSAMBAND FØROYA

 

A-bólkurin

Philp Lindgren (2166) – Rógvi E. Nielsen (2137): 1-0

Rógvi telvaði tíverri ikki á støði við tað, vit hava sæð frá honum fyrr í kappingini. Hann gloymdi útviklingina og lat kongin standa ov leingi á miðlinjuni og varð revsaður. Finnurnar ruku ein og tvær, og so var lítið, Rógvi kundi gera. Tað var ein keðiligur endi á eina annars sera góða kapping, men tað skal havast í huga, at tað er trupult at telva sítt besta í slíkari støðu, tá ein hevur mist eitt púra óneyðugt stig talvið frammanundan. Rógvi endaði á 4. plássi við 3½ stigi.

Heiðrikur T. Jacobsen (1899) – Henri Torkkola (2046): ½-½

Tað var ein heldur óvanligur variantur av benoni, har hvíta støðan tóktiskt nakað leys, men Heiðrikur varðveitti javnvágina við kreativum spæli. Hann var ongantíð í vanda ímóti hægrirataða finnanum; heldur umvent. Heiðrikur vann eina finnu í riddaraendtalvinum, men tað var trupult at fáa nakað ítøkiligt burtur úr fyrimuninum, og telvararnir tóku javnt. Enn eitt fínt úrslit hjá Heiðriki, sum fekk 1½ stig í kappingini. Hann var væl við øll talvini, og ofta manglaði lítið í, at meira kom burturúr.

 

B-bólkurin

Rúni T. Jacobsen (1478) – Stian Johansen (1990): 0-1

Rúni kom illa fyri tíðliga í talvinum sum hvítur ímóti einari byrjan, sum mótstøðumaðurin tíðiliga kendi væl. Hvítu finnurnar komu ov langt fram, og tað varð revsað. Rúni, sum var væl lægst styrkismettur í bólkinum, fekk 1 stig í kappingini. Støðurnar vóru til meira, men sigurin, hann fekk, var so eisini av heilt góða slagnum.

 

C-bólkurin

Høgni E. Nielsen (1978) – Jens Albert Ramsdal (1862): 1-0

Mótstøðumaðurin leikti ov varið, og so kundi Høgni seta fólkið í álopsstøðu. Danin megnaði ikki at verja fyri, og so breyt Høgni ígjøgnum við einum knúsandi offri. 4½ stig og 2. pláss til Høgna, sum telvaði sannførandi allan vegin. Tað kundi verið til meira í onkrum talvinum, men eisini til minni, so alt í alt á góðari leið.

Silas Eyðsteinsson (1763) – Gustav Halvarsson (1432): 1-0

Silas kom heilt væl frá byrjan, men fór við skeivum riddara niðan brekkuna (hin riddaraleikurin hevði givið greiðan fyrimun). Eftir eitt sindur av ping-pong kom Silas í verjustøðu. Mótstøðumaðurin offraði mann, og tað sá hættisligt út ta einu løtuna, men Silas fann allar teir røttu leikirnar. Álopið fánaði so hvørt, og so vísti maðurin sítt virði. 3 stig og 50% til Silas, sum vísti gott byrjanarspæl og telvaði væl upp ímóti báðum teimum, sum deildu fyrstaplássið við Høgna.

 

D-bólkurin

Eli W. Finnson (1334) – Teemu Virtanen (1796): 0-1

Eli telvaði ágangandi og stóð væl eftir fyrstu leikirnar. Hann gloymdi tó at fáa fólkið við, og finnurnar, sum vórðu tveittar niðan brekkuna, gjørdust veikar. So gekk tíverri skjótt tann skeiva vegin. Eli fekk 1 stig í kappingini, men støðurnar vóru sum vera mann til meira – eitt nú í 3. umfari, tá tað var líka við og næstan.

Bjarni Brimnes (1000) – Kunal Bhatnagar (1813): +-

Mótstøðumaðurin hjá Bjarna hevði undan umfarinum tikið seg úr kappingini vegna sjúku, og so kom Bjarni á talvuna. Bjarni, sum tók lut í NM á fyrsta sinni, var styrkismettur meira enn 400 ratingstig undir lægstu útlendsku telvararunum, og vit vistu, at tað fór at verða trupult. Hann tók tó ferð eftir ferð venjaran á bóli við umhugsnum og skilagóðum spæli. Góðu støðurnar vóru fleiri í tali, og við eitt sindur fleiri royndum hevði onkur teirra óviað verið til stig.

 

E-bólkurin

Ragnar Weihe (1047) – Nansy Davidsdóttir (1301): 0-1

Ragnar telvaði byrjanarspælið fínt sum hvítur ímóti sisilionskum, men flutti so ein ov bráan leik og misti mann. Ein óskettin leikur afturat kostaði mann nummar 2, og so var einki at gera. ½ stig til Ragnar í kappingini. Ragnar hevði fleiri lovandi støður (ikki minst ímóti norðmanninum í 2. umfari), og hevði hann sitið fastari á fingrunum, var onkur sigurin eisini komin í hús. Kortini væl avrikað av Ragnari, sum eins og Bjarni er nýggjur í NM-høpi.

Janus Skaale (1180) – Andreas Garberg Tryggestad (1819): ½-½

Vit høvdu undan síðsta umfarinum tosað um at bjóða javnt tíðliga í talvinum ímóti krútsterka norðmanninum, sum hevði nokk við hálvum stigi fyri at tryggja sær fyrstapláss í kappingini. Janus kom tó á aðrar tankar undir talvinum og gjørdi av at telva. Støðan var tó allatíð í javnvág, og tá mótstøðumaðurin bjóðaði remis í fullkomiliga symmetriskari støðu, gjørdi Janus rætt í at taka av. 3½ stig og fjórðapláss til Janus. Ótrúliga væl komið aftur eftir ringu byrjanina við 0/2.

 

Alt í alt eitt gott avrik av føroyska hópinum. Rógvi, Høgni og Janus vóru við í oddastríðnum í hvør sínum bólki, og allir telvararnir komu á stigatalvuna. Høgni var sannførandi og fekk eitt fult uppiborið silvurheiðursmerki.

 

 

A-bólkurin

Rógvi E. Nielsen (2137) – Anders Hobber (2201): 0-1

Rógvi kom eitt vet verri frá byrjan, men spældi seg so upp við nøkrum neyvum leikum og fekk takið. Hann fekk beint fyri svartpuntaða bispinum hjá norðmanninum, og so bleiv svarta kongastøðan ábær. Rógvi hevði einaferð góðan møguleika at fara beint eftir svørtu hátignini, men valdi ein varnari leik, sum kortini varðveitti fyrimunin. Okkara maður vildi ikki hava javnleikin, helt áfram at trýsta, men í nøkunlunda javnari støðu gjørdi hann ein grumman feil, sum kostaði rók. Súrt show, serliga tá ið hálva stigið allatíð var í nánd, men hinir duga jú eisini at telva.

Nokkvi Sverisson (1930) – Heiðrikur T. Jacobsen (1899): ½-½

Heiðrikur spældi enn einaferð pirc við svørtum, og hóast eitt óneyðugt tempotap í byrjanini kom hann heilt væl frá tí. Mótstøðumaðurin visti sær ikki betri at gera enn at býta frúnnar av og fara út í endatalvið. Íslendarin royndi at trýsta við bispi ímóti riddara, men Heiðrikur stillaði sín kong mitt á borðið og forðaði mótstøðukonginum at gera innrás. Heiðrikur var ongantíð í vanda og fekk ein góðan javnleik til høldar.

 

B-bólkurin

Rúni T. Jacobsen (1478) – Matthias Nielsen (1572): 1-0

Rúni telvaði italienskt og kom at standa heilt væl við sterkum miðfinnum og útviklingsfyrimuni. Mótstøðumaðurin kendi ikki teoriina og spældi ov passivt, og so lat Rúni sær ikki siga tvær ferðir. Ein riddari kom niðan á g5, síðani ein frúgv á h5, og so var galið inni á f7. Har var eingin slingur í valsinum, Rúni koyrdi sigurin heim uttan nakað himpr.

 

C-bólkurin

Dagur Ragnarsson (1826) – Høgni E. Nielsen (1978): 0-1

Høgni nýtti eina uppstilling, vit høvdu tosað leysliga um í gjár, og kom væl frá byrjan í stonewall hollendskum. Íslendarin royndi tíðliga í talvinum at leypa hvøkk á við einum at síggja til hættisligum, men í roynd og veru ósunnum offri, men Høgni fann tíverri ikki rætta aftursvarið. Støðan gjørdist fyrst fløkjaslig og síðani kritisk, eftir at svarti kongurin varð latin úr øllum klæðunum. Mótstøðumaðurin hevði ein møguleika av avgera talvið, men tók ikki av, og so kundi Høgni býta av til eitt endatalv við kvaliteti í yvirtali, men tveimum finnum í undirtali. Her vísti Høgni enn einferð góðan teknikk og hálaði stigið trygt í hús.

Oliver Johannesson (1699) – Silas Eyðsteinsson (1763): ½-½

Silas telvaði franskt við svørtum og kom fínt frá byrjan. Eftir hópavbýtingar kom eitt endatalv á borðið, har partarnir høvdu tveir rókar hvør. Silas skuldi vara sær fyri ávísum triksum frá mótstøðumanninum, men hann traðkaði aldrin við síðuna av og helt remis.

 

D-bólkurin

Eli W. Finnson (1334) – Bjarni Brimnes (1000): 1-0

Eli fekk tíðliga í talvinum eitt ávíst trýst á støðuna hjá Bjarna, sum gloymdi at yvirverja miðfinnuna á d5 og flutti ein bisp ov ofta í byrjanini. Svarta frúgvin kom í eina deyðiliga binding, og so var Bjarni prísgivin.

 

E-bólkurin

Valo Hallman (1609) – Ragnar Weihe (1047): 1-0

Ragnar kom væl frá byrjan og setti trýst á hvíta kongin oman eftir opnu g-linjuni. Hann sat og pønsaði upp á eitt bispaoffur niðri á h3, men finnin vardi tíverri fyri. Ragnar var omaná, tá komið var út í mispælið, men royndi seg so við einari kombinatión, sum miseydnaðist og kostaði mann. Ætlanin var tó góð. Ragnar royndi at trýsta finnan, sum var í tíðarneyð, eitt sindur afturat, men har var einki at gera.

Janus Skaale (1180) – Jacob Kryger Dyekjær (1150): 1-0

Janus royndi nýggjan taktikk: at spæla d4 í fyrsta leiki. Hann kom skjótt at standa betur, og við einari fiksari kombinatión vann hann sær eina finnu. Hann stillaði fólkið væl, og tá ið svartur opnaði kongasíðuna, har báðir kongar vóru farnir í borg, setti Janus hart ímóti hørðum. Álopið var eftir bókini, og svarti kongurin varð so dyggiliga settur skák og mát.

 

 

 

 

A-bólkurin

 

Mads Hansen (2226) – Rógvi E. Nielsen (2137): ½-½

Rógvi kom fínt frá byrjanararspælinum sum svartur í opna variantinum í sponskum. Sum frá leið fekk danin eitt ávíst trýst á svørtu støðuna, og tað sá út sum, at Rógvi fór at missa eina finnu í endatalvinum. Hann fann tó eitt kreativt framhald, og svarta fólkið, sum hevði staðið óvirkið, kom til lívs. Fjáltur kom á danan av óvæntaðu gongdini, og so kundi Rógvi taka kvørkratak. Bispaendatalvið var vunnið, men sum ikki einaferð var tíðarneyð atvoldin til, at teir bestu leikirnir ikki komu á borðið. Talvið endaði javnt, og Rógvi er enn einsamallur á odda við 3½/4.

 

Heiðrikur T. Jacobsen (1899) – Simon Pil Wilbrandt (1920): 0-1

Heiðrikur kom sum hvítur út í ein variant av sisilionskum, sum hann ikki hevði tann stóra kunnleikan til. Svartur fekk sum frá leið trýstið við bispapari og betri finnustøðu, men Heiðrikur setti klørnar í, helt fast og kom fyri seg. Hann hevði ein møguleika at fáa avgerandi fyrimun við at lumpa ein kvalitet frá mótstøðumanninum, men fann ikki leikin, sum var trupul at síggja. Ístaðin fór mótstøðumaðurin í álop, og at enda var tað eyðkenda bispaparið, sum gjørdist ov møtimikið.

 

B-bólkurin

 

Birkir Karl Sigurðsson (1694) – Rúni T. Jacobsen (1478): 1-0

Rúni telvaði við svarta fólkinum fyri triðju ferð av fýra. Tað bleiv enn einaferð spanskt, og Rúni sat enn einaferð við fínari støðu eftir byrjanarspælið. Hann loyvdi tó mótstøðumanninum ov frítt spæl við bispunum, og so líðandi varð trýstið inn á svarta kongin ilt at fáa bilbugt við. Í truplari støðu gjørdi Rúni ein bukk, og so var farið.

 

C-bólkurin

 

Høgni E. Nielsen (1978) – Egor Norlin (2005): ½-½

Høgni telvaði ímóti svianum, Egor Norlin, sum hann hevur havt manga hólmgonguna við í NM-høpi. Støðan var 2-1 til svian undan talvinum, men vit vóru uppsettir upp á at broyta tað. Høgni kom sum hvítur út í ein variant av fronskum, sum vit høvdu fyrireikað, og fekk ein lítlan fyrimun. Skjótt varð nógv fólk býtt av, og eitt javnt endatalv kom á borðið. Her vísti Høgni seg at vera tann stinnari, og við støðugum hóttanum fekk hann nápað sær eina finnu. Riddaraendatalvið var vunnið, men tað var ikki lætt, serliga ikki við fáum minuttum á klokkuni. Mótstøðumaðurin fekk at enda nóg mikið av mótspæli til at tryggja javnleik.

 

Silas Eyðsteinsson (1763) – Monika Machlik (1718): ½-½

Silas varð tikin á bóli av alekhine-byrjanini hjá norsku gentuni, men stýrdi á skilagóðan hátt støðuna yvir í italienskt, sum hann er kønari í. Gentan lat seg tó ikki imponerað. Hon býtti fólk av og spældi trygt. Støðan var í javnvág allan vegin. Tað var trupult hjá báðum pørtum at finna nakra greiða ætlan, og tá fleiri fólk so komu av borðinum, samdust telvararnir um remis.

 

D-bólkurin

 

Tobias Dreisler (1830) – Bjarni Brimnes (1000): 1-0

Tað varð spanskt, har Bjarni sum svartur spældi óneyvt í byrjanini, men slapp við eini lítlari skoynu í fyrstu syftu. Hann kom sum frá leið fyri seg, og hevði hann minst til at spjaða hvítu finnurnar, meðan hann hevði møguleikan, hevði Bjarni enn tá fingið fyrimunin. Tíverri bukkaði hann mann ístaðin, og so fór støðan í ommu sína. Kortini hugaligt, at Bjarni spælir upp ímóti mótstøðumonnum við 700-800 meira í rating stórar partar av talvunum.

 

Daniel Johnson (1433) – Eli W. Finnson (1334): 1-0

Eli flutti nakað skjótt ímóti óvanligu byrjanini hjá mótstøðumanninum og misti borgina tíðliga í talvinum. Hann fann tó skjótt rætta stevið, fekk fólkið í spæl og vann eina finnu. Eftir hetta var alt eftir bókini. Eli avviklaði til eitt endatalv við finnu meira, steðgaði mótspælinum hjá mótstøðumanninum og byrjaði at rulla finnurnar oman eftir borðinum. So hendi tað, sum ikki mátti henda: ein brølari, sum kostaði mann. Alt var tó ikki farið fyri skeytið, tí frífinnurnar hjá Eli vóru vandamiklar. Hann hevði einaferð møguleika at sleppa út í eitt frúgvaendatalv við finnu meira, men tók ikki av. Tað varð ein óheppin endi á eitt gott talv, men hugaligt er í øllum førum, at Eli megnar at spæla seg til góðar støður.

 

E-bólkurin

 

Jacob Kryger Dyekjær (1150) – Ragnar Weihi (1047): 1-0

Ragnar telvaði ov skjótt í byrjanini og misti ein rók inni á h8 eftir bert fáar leikir. Hann latst ikki um vón, men fór beint eftir hvíta konginum. Ragnar fann nakrar sterkar álopsleikir, og venjarin var imponeraður, men danin vardi væl fyri, og so gjørdist materielli fyrimunurin hjá mótstøðumanninum avgerandi.

 

Janus Skaale (1180) – Johan Møller Ochsner (1380): 1-0

Janus kom væl frá byrjan sum hvítur ímóti sisilionskum. Hann stillaði seg væl upp og valdi ta røttu ætlanina, men løtan var tíverri ikki tann rætta, og so reyk ein kvalitetur. Hóast bert ein minuttur var eftir á klokkuni eftir 20 leikir, stríddist Janus væl, helt fólkið á borðinum og forðaði mótstøðumanninum inn í støðuna. Danin fekk umsíðir býtt fólk av og nærkast sigrinum alt meira, men kom so til at nerta við eina eitraða finnu. Hann royndi at flyta annan leik, men Janus kravdi sín rætt, og so varð danin noyddur at seta rók í deyða. Janus førdi sigurin í hús við neyvum teknikki, og er nú væl við í kappingini við 2/4.

 

 

 

 

Rógvi E. Nielsen (2137) – FM Jonathan Westerberg (2312): 1-0

Rógvi telvaði við hvítum ímóti hægstrataða telvaranum í bólkinum. Mótstøðumaðurin yvirraskaði longu í fyrsta leiki við at leika fronsku byrjanina, og tað vardi ikki leingi, so var Rógvi á ókendum leiðum. Hann telvaði tó skilagott og vann skjótt eina finnu. Mótstøðumaðurin fekk nakað av spæli afturfyri, men Rógvi vardi væl fyri hóttanunum. Sviin kleimdi sitrónina dekan ov hart, og tað gjørdi Rógvi sær dælt av við tryggum, men aktivum spæli. Hóast mistar møguleikar í tíðarneyðini, førdi Rógvi sigurin trygt í hús. Hann er nú einsamallur á odda í A-bólkinum við 3/3.

 

B-bólkurin

Sam Kassani (2005) – Rúni T. Jacobsen (1478): 1-0

Rúni kom enn einaferð væl frá byrjan sum svartur í einum spanióla. Rúni spældi ágangandi og fekk býtt tann spanska bispin hjá mótstøðumanninum upp og givið honum eina veika dupulfinnu á d-linjuni. Rúni var omaná teir fyrstu 15 leikirnar ella so, men blandaði so tvær góðar ætlanir saman og hjálpti finnanum av við dupultfinnuna. Finnin fekk takið og slepti tí ikki aftur restina av talvinum.

 

C-bólkurin

Lars Oskar Hauge (2116) – Høgni E. Nielsen (1978): ½-½

Vit høvdu fyrireikað nakrar langar variantar í sponskum, men norðmaðurin veik frá longu í fyrsta leiki. Tað bleiv stonewall hollendskt, har Høgni kom væl frá byrjan. Mótstøðumaðurin royndi seg við einari kombinatión, men Høgni gav honum aftur av somu skuff. Tá roykurin lætti seg, hevði Høgni eina finnu minni, men gott mótspæl ímóti hvíta konginum. Mótstøðumaðurin gjørdi rætt í at taka remis við leikendurtøku. Høgni hevur nú 2/3 og er væl við í kappingini.

Jonathan Brauner (1971) – Silas Eyðsteinsson (1763): 1-0

Silas kom fínt frá byrjan sum svartur í einum heldur óvanligum kongaindara. Fleiri góðar ætlanirnar vóru at velja ímillum, men eftir ov nógv drál var tað mótstøðumaðurin, sum fekk trýstið. Silas offraði kvalitet fyri eina vandamikla frífinnu á b-linjuni, og tað var um reppið, at hann kundi halda endatalvið við bispi og trimum finnum ímóti róki og trimum finnum til javnleik. Men mótstøðumaðurin slapp at enda ígjøgnum og vann talvið.

D-bólkurin

Martin Percivaldi (1884) – Eli W. Finnson (1334): 1-0

Eli leikti álopskenda marshallvariantin í sponskum, sum hann hevði lisið uppá heima. Ætlanin var at leypa á sum Anand, og tað mundi eydnast. Ein riddari varð offraður niðri á h2, og tað sá út til, at danin fór at verða mátaður. Mótstøðumaðurin fann tó eina sera snilda verju, og so vísti riddarin seg at vera fangaður. Eli stríddist væl eftir hetta, men misti maðurin varð avgerandi í longdini. Í analysunum staðfestu vit, at danin hevði verið verjuleysur, um Eli hevði minst til at fingið frúnna við í álopið.

Bjarni Brimnes (1000) – Kristofer Joel Johannesson (1460): 0-1

Bjarni spældi fýraspringaraspælið í sponskum, har telvararnir herma eftir leikunum hjá hvør øðrum. Hann gloymdi tíverri sponsku tummilfingraregluna – at svara …d6 við h3 – og fekk eina keðiliga binding á seg frá einum bispi á g4. Bindingin var trupul at hava við at gera, og endin var, at mótstøðumaðurin fekk eitt mátálop inn ímóti hvíta konginum.

 

E-bólkurin

Ragnar Weihe (1047) – Janus Skaale (1080): 0-1

Tað bleiv ein sisilianari, har báðir stillaðu fólkið skilagott upp. Ragnar misti nøkur tempi við einum bispi, og so kundi Janus við einari fiksari kombinatión vinna sær eina finnu. Stutt eftir gloymdi Ragnar, at frúgvin stóð óvard aftan fyri riddaran, og so reyk eisini hann. Nú eru báðir teir yngstu so komnir á stigatalvuna.

 

Lagið í hópinum er annars stak gott. Teir spæla borðtennis og hugna sær í teldurúminum ímillum og eftir umførini. Finnar eru góðir fyrireikarar og hava lagt hópin av myndum, harav fleiri av føroyingunum, út á heimasíðuna hjá kappingini. Myndir kunnu síggjast her:

http://shakkivideot.kuvat.fi/kuvat/Nordic+Youth+Championship+2012+Espoo/

 

 

B-bólkurin

Rúni hevði hvítt ímóti svianum, Mikael Johann Karlsson (1867). Tað varð ein sisilianari, har Rúni sá út til at koma væl frá byrjan, men so fór á ránsveiðu við einum riddara uttan at hava fingið kongin í borg og varð revsaður í hinum endanum. Fyrst ruku tvær finnur, síðani ein triðja, og so var vónleyst. Feilurin var bara ein í tali, men hann kostaði dýrt.

C-bólkurin

Silas telvaði sum hvítur sponsku byrjanina ímóti finska Toni Pajunen (1617). Mótstøðumaðurin telvaði støðuna í og so afturhaldið, og Silas nýtti høvið at fara í álop. Hvíta fólkið savnaðist um svarta kongin, og tá ein gaffil so kostaði finnanum ein mann, var spælið úti. Hann stríddist víðari, men Silas setti hann endaliga upp á pláss við góðum taktiskum hegni.

Høgni fekk við hvíta fólkinum tíðliga í talvinum fyrimun ímóti finska Matias Lappalainen (1828). Við finnu í yvirtali og álopsmøguleikum ímóti svarta konginum var Høgni ávegis einum góðum sigri, men tá frúnnar so komu av borðinum, fekk mótstøðumaðurin ávíst mótspæl. Tað gekk tíverri heilt galið seinni í talvinum, og Høgni endaði í taptari støðu. Hann vildi tað tó øðrvísi, og júst sum venjarin helt, at talvið var farið, fann Høgni Rf4+! Støðan var enn tapt, men tað kravdi neyvleika frá mótstøðumanninum, og við bert fáum minuttum á klokkuni trekti finnin í neyðbremsuna og tók javnleikin. Venjarin var glaður 

D-bólkurin

Bjarni hevði hvítt ímóti Teemu Virtanen (1796). Finnin telvaði pirc, og Bjarni telvaði leingi fult upp ímóti høgtrataða mótstøðumanninum. Miðskeiðis í miðspælinum yvirsá hann tó eina taktiskan vending frá finnanum, og so fullu finnurnar bæði ein og tvær. Bjarni stríddist alt, han var mentur, men at enda varð brekkan ov tung.

Eli hevði hvítt ímóti Tobias Dreisler (1830), sum telvaði drekavariantin í sisilionskum. Eins og aðrir av teimum ungu, leikti Eli dekan ov skjótt í byrjanini og kom undir trýst. Við dupultfinnum á c-linjuni og e-linjuni var trupult hjá hvítum at fáa aktivt spæl, og tað vóru í longdini veiku finnurnar, sum avgjørdu talvið til svartan fyrimun.

E-bólkurin

Janus hevði svarta fólkið ímóti íslendsku Nansy Davidsdóttir (1301). Gentan spældi skotsk, sum Janus lítið og einki kendi til undan talvinum. Ein ov bráur leikur kostaði mann, og so var lítið, okkara maður kundi gera.

Ragnar kom væl frá byrjan við svarta fólkinum ímóti norska Yngve Fossheim (851). Hann misti eina finnu eftir tveir ov knappar leikir, men fekk vandamikið mótspæl ímóti hvíta konginum við einum bispi á a8 og frúgv á c6. Ragnar hevði møguleika at avgera talvið við einum mátálopi, og hann spældi eisini tann fyrsta leikin av kombinatiónini, men fann tíverri ikki rætta framhaldið. Mótstøðumaðurin vann ístaðin tvær finnur, sum vórðu avgerandi seinni í talvinum.

 

Alt í alt 3 stig hetta umfarið. Vit vóru hepnir í summum talvum, men mistu eisini onkran gyltan møguleika, so úrslitið má sigast at vera rættvíst og nøktandi.

 

3. umfar byrjar í morginárini kl. 08 føroyska tíð. Fylgið við live á: http://nuortenpm.shakkiliitto.net/index.php?option=com_content&view=article&id=53:pairings-for-first-round&catid=1:latest-news&Itemid=1

 

 

 

B-bólkurin

Rúni hevði svarta fólkið ímóti dananum Casper Christensen (1955). Danin veik frá tí, sum vit høvdu fyrireikað undan talvinum, men Rúni fann allar teir røttu leikirnar og kom frá byrjanini við greiðum fyrimuni. Hvíti kongurin, sum ongantíð slapp í borg, var undir trýstið alt talvið, og tá Rúni eisini vann eina finnu, vóru vónirnar til sigurin heilt góðar. Støðan var tó fløkjaslig, og alt meðan tíðin byrjaði at ganga undan, yvirsáð Rúni eina taktiska finessu. Og tað var tað stigið. Spell, men Rúni vísti góðar taktir.

C-bólkurin

Silas møtti einum av kappingarfavorittunum, svianum Egor Norlin (2005). Silas kom væl frá byrjan sum svartur í einum kongaindara og forðaði mótspælinum hjá hvítum á tematiskan hátt við 10…a5! Næstu leikirnir vóru eisini eftir bókini, men so slapp ein hvítur riddari inn á e6. Silas kundi varðveitt javnvágina við 18…Rfb8 við ætlanini at dobbla á b-linjuni, men valdi skeivu ætlanina. Tá tann næsti riddarin eisini slapp inn í støðuna, hesaferð á b6, varð trýstið ov stórt. Kortini væl telvað av Silasi, sum sýndi gott forstáilsi fyri kongaindaranum.

Høgni telvaði við svørtum ímóti norsku gentuni, Moniku Machlik (1718). Høgni fekk tíðliga í talvinum trýst ímóti hvítu finnunum á c3 og c4, og sum frá leið var tað bara ein spurningur um tíð, áðrenn ein teirra mátti av borðinum. Við sterkum positiónsspæli gagnnýtti Høgni til fulnar veikleikarnar í hvítu støðuni, og bispaendatalvið við finnu í yvirtali varð ført trygt til sigurs.

D-bólkurin

Eli telvaði við hvítum ímóti svianum Kunal Bhatnagar (1813). Mótstøðumaðurin leyp hvøkk á við einum frúgvaleiki út á a5 í byrjanini, og Eli fann ikki besta aftursvarið. Ein óneyvur leikur var nóg mikið til, at mótstøðumaðurin vann kvalitet og fekk avgerandi álop. Sjálvt tann besti kann verða tikin á bóli í byrjanini, so vit hava avtala, at hatta tapið ikki telur meira enn hálvt.

Hóast mótstøðumaðurin leikti heldur enn ikki óvanligt, kom Bjarni væl frá byrjan við svørtum ímóti finnanum Jan Demidov (1786). Í javnari støðu blandaði hann tó tveir leikir saman og misti mann. Bjarni stríddist manniliga og setti fellur fyri mótstøðumanninum, har hann kundi, men at enda varð tann misti maðurin avgerandi.

E-bólkurin

Janus telvaði við hvíta fólkinum ímóti 8 ára gamla stórtalentinum úr Íslandi, Vignir Vatnar Stefansson (1461). Vit høvdu fyrireikað ein langan, vandamiklan variant ímóti sisilionsku byrjanini, men mótstøðumaðurin yvirraskaði okkum tíverri longu tíðliga í talvinum. Janus lat ikki við seg koma, telvaði væl, og hóast dupulfinnu á c-linjuni fekk hann avvikla til eitt javnt endatalv. Ein óneyvur leikur var tó nokk til, at mótstøðumaðurin slapp inn annað rað við rókunum og fekk vinnandi fyrimun.

Ragnar hevði hvítt ímóti svianum Klemens Ng (1537). Hóast kongarnir fóru í stuttu borg, vardi ikki leingi, so høvdu báðir partar blaka g- og h-finnur niðan brekkuna. Finnurnar møttust á hálvum borði, og h-linjan varð opnað oman ímóti konginum hjá okkara manni. Tað sá hættisligt út eina løtu, ikki minst tá sviin offraði mann niðri á g2 og sendi frúgv og rók oman eftir h-linjuni, men Ragnar fann røttu verjuna, og mótstøðumaðurin mátti ásanna, at tað var sum at sletta vatn á gás. Tá saman um kom var tað svarti kongurin, sum var í størri vanda enn tann hvíti. Ragnar bjóðaði javnt við manni meira, og sviin sá ikki aðrar møguleikar enn at taka av. Tað hevði sjálvandi verið stuttligt at fingið alt stigið, men ein sera góð byrjan hjá Ragnari ímóti einum mótstøðumanni, sum er rataður næstan 500 stig hægri.

 

2,5 stig í fyrsta umfari má sigast at vera á einari leið. Av tí at ovara hálva á styrkilistanum møtir niðaru hálvu í fyrsta umfari, og flestu føroyingarnir eru styrkismettir í niðaru hálvu, er mótstøðan sum vera man serliga hørð í fyrsta umfari. Vónirnar eru tí góðar til fleiri stig komandi umførini.

 

Kappingin byrjar fríggjadagin 04. apríl, kl. 18.00, tá eitt umfar verður telvað. Leygar- og sunnudagin verður byrjað kl. 10.00 og 15.00.

Tíðin til alt talvið verður 1 ½ tími + 30 sekund fyri hvønn leik.

Vinningar

Virðislønir verða latnar nr. 1, 2 og 3, umframt ratingvirðislønir.

Luttøkugjaldið er 100 kr fyri vaksin, 50 kr unglingar. Skal gjaldast á staðnum áðrenn telvað verður fríggjakvøldið 04. apríl.

Tilmelding

Smsa luttøku (navn + rating) hjá Talvsambandinum: tlf. 22 00 13 og ella við telduposti til  faroechess@faroechess.com

Seinasta freist at melda til er mikukvøldið 01. apríl kl. 21:00 – tað verður ikki tikið móti tilmelding eftir freistina !

Luttakaratalið avger um telvað verður í Havnar Telvingarfelag ella øðrum stað. Kunngjørt beint eftir tilmeldingarfreistina.

Møtið Fjølment !

Havnar Telvingarfelag

Sum siður er, vóru NM-luttakararnir til dystin fús tá Rókur Open varð telvað í vikuskiftinum.

9 unglingar fara til Finnlands í februar mánað, og er RO liður í fyrireikingunum – samanlagt vóru 20 luttakarar har ímillum Olaf Berg og Martin Poulsen, so kappingin var ikki nøkur "walk over".

Rógvi Egilstoft Nielsen lat tó ongan iva vera um úrslitið í Rókur Open. Hann vant burturúr hinum telvarunum, og endaði kappingina við 5 stigum av 5 møguligum !  Á øðrum plássi endaði Høgni Egilstoft Nielsen við 4 stigum og Martin Poulsen varð nr. 3 við 3½ stigi.

Ratingvirðislønirnar vunnu Jónfinn Thomsen 1800-2000, Rúni Tindskarð Jacobsen 1201-1500 og Hanna Jacobsen 1000-1200

 

Endaliga støðan finst á:

http://chess-results.com/tnr63858.aspx?art=2&rd=1&lan=1