Talvsamband Føroya Faroechess

Telvararnir við hægsta styrkitalinum í Landsliðsbólkinum, Helgi Dam Ziska og Rógvi Egilstoft Nielsen, vunnu báðir í fyrsta umfari í FM-kappingini í talvi fyri einstaklingar í gjár. Helgi vann á Ólavi Simonsen og Rógvi á Hans Kristiani Simonsen. Á hinum borðunum var remis. Carl Eli Samuelsen og Sjúrður Thorsteinsson telvaðu javnt sínamillum, og sama gjørdu Rani Nolsøe og Rógvi Mortensen.

Í dag klokkan 14.00 verða fyrstu leikirnir fluttir í árligu FM-kappingini í talvi fyri einstaklingar. Telvað verður í Finsen í Havn – í stásiligu, nýumvældu fyrrverandi kommunuskúlaauluni. Fyrrverandi føroyameistari og formaður í Talvsambandi Føroya – og skúlastjóri í Tórshavnar Kommunuskúla – Hanus Joensen flytur fyrsta leikin í kappingini. Dómari í kappingini er Arild Rimestad, sum er altjóða viðurkendur talvdómari, og virkar sum dómari í kappingum í Danmark og í útlondum. Arild er uppvaksin í Havnar Telvingarfelag, men hevur búð í Danmark í fleiri ár. Í alt 45 telvarar eru við í kappingini. Átta kappast um FM-heitið í Landsliðsbólkinum, átta eru í 1. bólki, fimtan í almenna bólkinum og fjúrtan í unglingabólkinum. Opið og ókeypis er hjá almenninginum at støkka inn á gólvið í Finsen at síggja, hvussu leikur fer. Mesti spenningurin er sum vera man um kappingina í Landsliðsbólkinum.  FM-bólkurin er sterkur í ár. Treyðugt so, hann kundi verið uppaftur …

Leygardagin byrjar árliga føroyameistarakappingin í talvi fyri einstaklingar. Telvað verður í Finsen – gomlu kommunuskúlaauluni í Havn. Umførini eru sjey í alt. Lagt verður fyri leygardagin 24. mars, og kappingin endar Langa fríggjadag 30. mars. 

Landskappingin í talvi endaði um vikuskiftið. Allir dystirnir í seinasta umfari vórðu telvaðir á Finsen í Havn leygardagin. Í 1. deild endurvann Havnar Telvingarfelag meistaraheitið. Avgerandi dysturin millum oddaliðini Havnina og Sandavág endaði javnur 2-2. Javnleikurin tryggjaði havnarmonnum FM-heitið. Hjá vágamonnum kravdist ein 3-1 sigur, skuldu teir ogna sær meistaraheitið.

Í morgin leygardagin fellur avgerðin í landskappingini í talvi 2018. Allir dystirnir í seinasta umfari vera á Finsen í Havn – í nýumbygdu gomlu kommunuskúlaauluni. Fyrstu leikirnir verða fluttir longu klokkan tíggju fyrrapartin.

Luttakaralistin til FM.

Talvkapping fyri børn og ung verður á Eiði sunnudagin 18. mars kl. 14. Telvað verður í skúlanum á Eiði. Øll eru vælkomin at vera við, bara man dugir mannagongdina. Telvað verður í 5 aldursbólkum: • 2 flokkur og yngri • 3 og 4 flokk • 5 og 6 flokk • 7 og 8 flokk • 9 flokk og 10 flokk

Síðsta umfar í liðkappingini verður telvað leygardagin 17.03.2018 í Finsen. Byrjað verður kl. 10.00.

Einki er avgjørt í nakrari deild eftir dystirnar í næstseinasta umfari í landskappingini í talvi í dag. Í báðum fremstu deildunum bíða rættir finaludystir í síðsta umfari um tvær vikur, og í 3. deild er heldur einki avgjørt. Havnin og Sandavágur Í 1. deild stendur kappingin enn sum áður millum Havnina og Sandavág. Bæði vunnu sannførandi í dag. Vágamenn vunnu 4-0 á kollfirðingum og FM-manningin hjá Havnar Telvingarfelag vann 3-1 á Klaksvíkar Talvfelag. Tað ber í sær, at munurin tódnaði niður í tvey stig. Fyritreytirnar undan avgerandi toppdystinum millum oddaliðini í síðsta umfari minna nógv um støðuna í fjør. Tá vunnu vágamenn 3-1, men gjørdust kortini eitt hálvt stig ov stuttir.

Í morgin sunnudagin verður níggjunda og næstsíðsta umfar í landskappingini í talvi. Í øllum deildum valdar spenningur, tí stutt er millum oddaliðini. Í fremstu deildini tykist Havnar Telvingarfelag kortini at hava góðar møguleikar at endurvinna meistaraheitið. Fyri dystirnar í morgin eru teir trý stig undan harðastu kappingarneytunum.